ھەولێر، ھەڵمەتێکی چڕ بۆ پاراستنی ژینگە و ڕووبەڕووبوونەوەی زێدەڕۆیییەکان دەستپێدەکات
ھەولێر-KDP.info- ئەمڕۆ چوارشەممە ٢٤ی حوزەیرانی ٢٠٢٦، لە ھەنگاوێکی نوێدا بۆ پاراستنی سامانی سروشتی و ڕێگریکردن لە پێشێلکارییەکان، ئومێد خۆشناو، پارێزگاری ھەولێر، لە دیوانی پارێزگا لەگەڵ بەرپرسانی باڵای پۆلیسی دارستان و ژینگەی ھەرێم و ھەولێر کۆبووەوە.
لە کۆبوونەوەکەدا، جەخت لەسەر چەند خاڵێکی ستراتیژی کرایەوە، لەوانە داڕشتنی پلانێکی تۆکمە: بۆ پاراستنی ڕووبەرە سەوزاییەکان و سامانی دارستانەکان لە سنووری پارێزگای ھەولێر. ڕێگریکردنی پێشوەختە: دانانی میکانیزمی خێرا بۆ پێشگرتن لە ھەر جۆرە زێدەڕۆیییەک بۆ سەر موڵکی گشتی. بەھێزکردنی ھەماھەنگی: کاراکردنی زیاتری پەیوەندیی نێوان دامەزراوە پەیوەندیدارەکان و لیژنەی "پاراستن و چاککردنی ژینگە" لەگەڵ ھێزەکانی پۆلیسی دارستان.
پارێزگاری ھەولێر لە میانەی کۆبوونەوەکەدا، ئەرکەکانی پۆلیسی دارستانی بەرز نرخاند و پشتیوانیی تەواوی پارێزگای بۆ سەرخستنی کارەکانیان ڕاگەیاند. ناوبراو جەختی کردەوە: پاراستنی ژینگە و سامانی گشتی ئەرکێکی نیشتمانییە، بۆیە پێویستە بە توندی و بەبێ جیاوازی ڕووبەڕووی ھەر سەرپێچیکارێک ببینەوە کە ژینگەی نیشتمانەکەمان دەکاتە ئامانج."
ئەم ھەنگاوە وەک بەشێک لە بەرنامەی فراوانی پارێزگای ھەولێر بۆ بەرەنگاربوونەوەی دیاردەی زێدەڕۆیی و پاراستنی سەلامەتیی ژینگەیی ناوچەکە دێت.
