پەیامی سەرۆک بارزانی بۆ یادی دامەزراندنی ئێزگەی دەنگی کوردستان
ھەولێر-KDP.info- سەرۆک بارزانی بەبۆنەی یادی دامەزراندنی ئێزگەی دەنگی کوردستان پەیامێکی بڵاو کردووەتەوە و تێیدا کارەکانی ئێزگەکە لە گواستنەوەی دەنگی شۆڕش و ھەواڵەکانی نەبەردیی و داستانەکانی پێشمەرگە بە خەڵکی خۆڕاگری سەرانسەری کوردستان بەرز دەنرخێنێت.
دەقی پەیامی سەرۆک بارزانی
بەناوی خودای مەزن و دلۆڤان
بەڕێوبەر و کارمەندانی ئێزگەی دەنگی کوردستان
بە بۆنەی شەست و دووەمین ساڵیادی دامەزراندنی ئێزگەی دەنگی کوردستان، پیرۆزباییەکی گەرم لە ئێوەی خۆشەویست و جەماوەر و لایەنگرانی پارتی و خەڵکی کوردستان دەکەم.
دامەزراندنی ئێزگەی دەنگی کوردستان لەو ڕۆژگارە سەخت و پڕ شانازییەدا، ھەنگاوێکی گرنگ بوو لە گەیاندنی دەنگی شۆڕش و ھەواڵەکانی نەبەردیی و داستانەکانی پێشمەرگە بە خەڵکی خۆڕاگری سەرانسەری کوردستان و ڕێگەیەکی سەردەمیانە بوو بۆ گەیاندنی پەیامی مەزڵوومییەتی گەلی کوردستان و دۆزە ڕەواکەی بە ڕای گشتیی عێراق و ناوچەکە و جیھان.
ھەر لەم بۆنەیەدا، سوپاسی ھەموو ئەو خەباتگێڕ و تێکۆشەرانە دەکەم کە ڕۆڵیان لە بەردەوامی و زیندووھێشتنەوەی دەنگی دلێری ئێزگەی دەنگی کوردستاندا ھەبووە.
داواتان لێدەکەم بەردەوام بن لە کارکردنی میدیایی ڕاستگۆ و سەنگین و دەستگرتن بە بەھا نەتەوەیی و نیشتیمانی و مرۆڤایەتییەکان و بەردەوامی بەو نەھجە ئازاد و شۆڕشگێڕانە و دیموکراسیە بدەن کە ئەو ئێزگەیەی لە پێناودا دامەزراوە.
ھەر سەرکەوتوو بن
مسعود بارزانی
٢٧ی ئەیلوولی ٢٠٢٥
