سەرۆك بارزانی سه‌ره‌خۆشى له خانه‌واده‌ى د. ده‌شتى دزه‌یى ده‌كات
ھەولێر-KDP.info- سەرۆك بارزانی، بۆ کۆچی دوایی دكتۆر دەشتی دزەیی، کەسایەتیی دیاری ھەولێر و پزیشک و زانای کورد، پەیامێکی سەرەخۆشی ئاراستەی بنەماڵەکەی دەکات.
دەقی پەیامی سەرەخۆشی سەرۆك بارزانی.
بەناوی خودای مەزن و دلۆڤان
بەداخێکی زۆرەوە ھەواڵی کۆچی دوایی کەسایەتیی دیاری ھەولێر و پزیشک و زانای کورد دکتۆر (دەشتی دزەیی)ـم پێ گەییشت.
دکتۆر دەشتی دزەیی بەشی زۆری تەمەنی خۆی بۆ خزمەتکردنی بواری ئاکادیمی و پزیشکیی کوردستان و یارمەتیدان و چارەسەرکردنی نەخۆشەکان سەرف کردووە و لە ھەمانکاتیشدا کەسایەتییەکی نیشتیمانپەروەر و پەرۆشی تەندروستیی ھاووڵاتیان بوو و پێگەیەکی بەرزی لە ناوەندە زانستی و پزیشکی و جەماوەرییەکاندا ھەبوو و لەدەستدانی خەسارەتێکی گەورەیە.
پرسە و سەرخۆشیی خۆم ئاراستەی خانەوادە و کەسوکار و دۆستان و ھاوکارانی خواڵێخۆشبوو دکتۆر دەشتی دزەیی و سەرجەم پزیشکانی کوردستان دەکەم و خۆم بە ھاوبەشی خەمیان دەزانم.
لە خودای گەورە داواکارم گیانی خوالێخۆشبوو دکتۆر دەشتی دزەیی بە بەھەشتی بەرین شاد بکات و سەبر و ئارامی بە ھەموو لایەک ببەخشێت.
انا للە و انا الیە راجعون
مسعود بارزانی
٢٥ی کانوونی دووەمی ٢٠٢٥
