سەرۆک ل بهدینان، چ گەهاند چ وەرگرت؟
خالد ئه‌حمه‌د
سەرەدانا سەرۆک مسعود بارزانی بۆ خەلک و دەڤەرا بهدینان بۆ ماوێ هەفتیەکێ و د ڤێ رەوش و سەقایێ دەڤەر تێدا دەرباز دبیت، گەلەک رامان و پسیارا دهەلگریت، شرۆڤێن جودا بۆ دهێن کرن، و پتر ژ ئارمانجەکێ ب خوڤە دگریت.. یا ژ هەمیا دلخوشتر ساخلەمیا سەرۆکی بوو کو د هەر روژەکێ بۆ ماوێ هەفتیەکێ سێ دیدارێن جەماوەری یێن مەزن ئەنجام دان کو هەر ئێک کێمتر نەبوو ژ دوو دەمژمێرا ژ گوتن و گوهدانێ، ئەڤە بۆ کەسەکێ د تەمەنێ سەرۆکی دا و ل بن فشار و بارگرنیا ئەو تێدا دژیت، ب خوە بهێزترین پەیام بوو کو لێڤەگەرێ کوردان و کوردستان و دیموکراتخواز و ئازادیخوزان ب خێر و سلامەتە. هێز و بەردەوامیا پارتی د وێرێ دا یە، ژێدەرێ سیاسەت و سەرکردایەتی و بەرنامێن پارتی د لوجیکی یە و گرێدای ژین و بەرژه‌وەندا خەلک و جەماوەری یە، سەرۆکی دزانی خەلکێ چ پێتڤیە، لێ د ڤیا ژ وان ب خوە گوهلێبیت کانێ ژ چ دلگرانن و چەوا هزر دکەن و گرانیا بارودۆخێ هەرێم یێن تێدا دەرباز بووی د چەند سالێن بۆری چەند باندۆریا خوە ل باوەری و دەرون و هەلویستێ خەلکی کریە. پەیڤێن سەرۆکی، تەکەزی ل سەر هەمان پرەنسیپێن جاران بوون، باوەریا مکوم ب سوبەهیەکا باشتر و گەشتر و کارکرن ب هزر و عقیدا نەتەوەیی و نیشتمانی و ئاڤاکرن و ئێک دوو قەبیل کرن و پێکڤەژیان و پاڤژیا ژینگەه و دەرونێ مرۆڤی و بەرهنگاریا پیلان و ئاتاف و ئاستەنگا... جوداهی هەبوو ژ جاران ژ دەستنیشانکرنا مەترسیێن ل سەر جڤاکێ کوردستانێ ژ بێکاریێ و مادێن بێهوشکەر و هەستا نەتەوەیی د پرۆسا پەروەردەیی و مالباتێ دا .. یا من ژ پەیڤێن خەلکێ بەهدینان فام کری، مخابن هێشتا ل دەف گەلەکا تێکەلی هەیە د ئەرک و بەرپرسیارەتیا هەر کەسەک و ئۆرگانەکی دا و ل هەر جهەک و دیوانەکێ دا، خەلکەک هەبوو گازندێن بچیک د دەرفەتەکا زێرین دا دکرن، داخازیێن کەسی د جڤاتەکا گشتی دا هەبوون، بابەتێن گرنگ ب دەربرین و سەردەکا بێجارە ڤەدگیران، راوەستیا ل سەر کێشێن لاوەکی و بازدان ل سەر کێشێن سەرەکی و بنەرەتی .. هەبوون ژی گەلەک ب جوانی و زانستی شرۆڤا پێتڤی و بۆشایی و کێماسیا کرن، بەلێ ب دیتنا من پێتڤی بوو سەنتەر و رێڤەبەری و کۆمپانی و ئەکادیمی و هاوولاتی ب بەرهەڤی و پرۆژە و ڤەکۆلین و داتا و بەڵگە حازر بان هەمبەری سەرۆکی، دا پتر ئارمانجا سەرۆکی پێکهێت و خاستەکێن خەلک و باژێر و گوندان گەهن .. سەرۆک گەلەک ب گەشبینی و باوەری د نێری هەرێمێ و ئایندێ و تەکەز د کر کو هەرێم ژ قوناغا مەترسیێ دەرباز بوویە و بایێ گۆڕانکاریێ بەرەف کوردستانێ یە، گرنگیا ئێکڕێزیا کوردان پەیڤا سەر زارێ سەرۆکی بوو بەلێ پسیارا جەنابێ وی ژی ئەو بوو ل سەر چ رێکەڤین؟ هندەک د سەر رێ دا چوینە و رێکا خوە بەرزە کریە. سەرۆکی ب گەشبینی ڤە سەر ئەوا هاتی کرن و دێ هێتە کرن پشتی کونگرێ ۱٤ێ راوەستیا .. دەست ل سەر برینێن چڤاکی دانا ئەو ژی ئەوە دڤێت گەنجێن مە ب شۆل کەڤن و شول بکەن نەک ب موچە بکەڤن، سەرۆک یێ رژد بوو دڤێت ڤەگەرین سەر ئاخ و وارگەه و ژێدەرێن ژیانی کو چاندن و گەشتو گوزارە هەر تشتێ رێگریێ بکەتن دێ هێت راکرن.
